Ko ōku wawata mō te tau 2024

Tēnā koutou katoa, e te whānau!  Anei tāku mihi maioha o te Tau Hōu Pākehā ki a koutou.  

Ko tōku tūmanako kua manahau ō koutou hararei i raro i te hihi a Tamanuiterā!  Inā te kaha o te aho kānapanapa i te raumati ātaahua rawa atu nei🌞

Ki ahau nei, i tīmatahia tō mātou tau hōu nei i tētahi wharekai Hapanihi.  Ahakoa kua neke atu i ngā 20 tau e noho ana au kei Aotearoa, e whai tonu ana au i ngā tikanga Hapanihi i te mutunga o te tau me te tīmatanga o te tau.

I roto i te Ao Hapanihi, he tino whakahirahira ngā rā e whā mai i 31 o Tīhema ki 3 o Hānuere.  

I ahau e tamariki ana, ko te tikanga o tōku whānau ki te haere ki tō mātou ahurewa Shinto i te waenganui pō o 31 o Tīhema.  Koinei te wā kia tukuna tō mātou inoi ki ō mātou atua, arā, ki ngā kaitiaki o tō mātou whenua.

Ko te atua matua o tēnei ahurewa ko Susanoo-no-Mikoto.  Ko ia te atua o te moana, o te āwhā, o te ahuwhenua anō hoki.

E ai ki te tikanga Hapanihi tawhito, kāore te tunu kai i te pai i ngā rā e toru o te tīmatanga o te tau.  Nō reira, ka tunua ngā kai i mua i te 31 o Tīhema, ā, ka whakakīa ngā pouaka tapawhā rite e ēnei kai (pēnei i te pouaka bento) kia kaingia ai hei te roa o ngā rā e toru e whai ake nei.

Heoi anō, i te tau nei, kāore mātou i whakareri i tēnei momo kai, ā, i haere kē mātou ki tētahi whaerekai Hapanihi ki Onehunga.  I ētahi wā, he māngere nōku ki te whai tikanga... E huri haere ana te ao, e huri haere hoki ana ētahi tikanga.

Anei ētahi o ōku wawata mō te tau 2024:

- E hiahia ana ahau kia whakawhanaketia āku pūkenga o te tuhinga reo Māori.

- E pīrangi ana ahau ki te whakamāori i tētahi pakiwaitara Hapanihi.  

- E hiahia ana ahau ki te hāpai i ngā kaupapa Māori, ina koa, i ngā kaupapa Tiriti (nā te koretaketanga o te kāwanatanga upoko pakaru e toru!)